睇見《死侍》嘅大惡人Francis，就好自然諗起安祖卡路爾：個樣又似，大大隻身形又似，連好勇鬥狠都似埋，希望下場唔似啦。成日都掛住卡路爾，因為見到佢嘅機會唔係幾多；係呀，佢又傷咗嘞，old news is so exciting。如果冇睇過佢落場有幾搏，一般人肯定會認為呢位仁兄係詐傷嘅懶鬼，偏偏佢唔係嗰吓先慘。
對球員嚟講，有乜嘢慘得過受傷？就係受傷之後仲畀人笑囉。而最唔好笑嘅係，以前係對手球迷笑卡路爾，到最近已經傳染到韋斯咸球迷。當自己友都笑埋一份，即是話大家受夠了，準備放棄你。
講明先，放棄佢嘅唔包括我，但老細撐唔撐先係關鍵。幾個月前比歷初嚟埗到，當時卡路爾正路係養緊傷，比歷就話佢唔怕慢慢唞，最緊要唔好急住復出；復出後亦唔使就住就住，做番自己就得，因為橫衝直撞係佢風格，Be Yourself！最近一場佢後備入替踢咗半個鐘，結果又整親，要唞到下個月。比歷今次講真話嘞，佢話卡路爾嘅最大敵人就係佢自己，嘩咁深嘅？
「卡路爾係好nasty嘅球員，落場佢一定損手爛腳，因為佢去到盡，又飛鏟又飛頂，飛到冇力為止！」嘩成隻無腳嘅雀仔咁，其實狼死得嚟都幾浪漫吖。
「好似拳擊手咁，如果落場淨係識一味進攻同出拳，好快就會畀人打低。踢波又好，打拳又好，最緊要搵到自己嘅節奏，Rhythm！」節奏，即是攻一輪要守番陣，避免後防空虛；快完一輪要慢一陣，可以唞順條氣；茅完一輪要扮斯文一陣，避免球證針對；衝動一輪要冷靜一陣，費事提早出場。以上嘅節奏係講緊自發嘅，做得到，條路就襟行好多。不過，我發現節奏同魚尾紋一樣係冇得強求嘅；當你累積咗足夠經驗，某一日你就有個beat嘞。只希望卡路爾搵到個beat嗰一日，仲未退休啦！
KEYMAN
節目主持
電郵：mailto:[email protected]