大記者坐的士去中環食飯兼開會，的士司機沿途一路鬧年初二凌晨旺角「暴徒」，搞到大記者想閉目養神都唔得，唯有插嘴講一句：「班年輕人係忍無可忍嘅啫，我好怕暴力事件，但梁振英政府長期有權盡用，我行我素，唔聽市民聲音，年輕人嘈佢，未必全無道理。」司機聽完更加發火，大罵示威者街頭挖磚掟警察，惹起火頭……餘下不表。
好彩冇塞車，大記者幾快就到咗中環一間會所，與一班人開會，有老有嫩，點知工作會議變成「旺角論壇」，老嘅係波士級領導人階層，年輕人係大學畢業三幾年嘅「實幹」執行階層，一講到政治，就無尊卑之分，大記者等年紀較大人士對向警察擲磚頭之暴力，期期以為不可，但幾位年青人就堅持「交通警察拔槍噃，點解人民唔可以掟磚？」如此這般爭辯起來，工作會議冇人記得咯，卒之都係年紀大嘅主席大喝一聲：「唔再講呢啲嘢」，先至恢復正常程序。
小記者G係年輕人，佢嘅世伯對佢講：「我屋企吃飯規定唔准講政治，前日阿仔違反規矩，大罵黑警港豬，老婆黑晒面鬧佢冇規冇矩，漠視法紀，阿女加入鬧阿媽唔識嘢，哎吔，亂晒大龍，我連忙吹雞叫停，點知仔女一齊話唔食飯嘞，走咗出街，深夜十二點先至返屋企，我老婆都唔知幾激氣。」
好明顯，香港嘅中間派溫和派愈來愈無位企，左丁山素來主張非暴力爭取民主，要做民主死士、烈士，唔該你地做嘞，如葉一堅話齋，叫他人的孩子做烈士，不叫自己的孩子做烈士，是否可以心安理得，睇住別人的孩子去死呢？本土激進派目前仍然面貌模糊，究竟佢地想達到甚麼目標，用甚麼手段手法，是否犧牲性命在所不惜，都未講清楚。在香港搞暴力反政府運動，不會達成任何爭取民主的結果，因為面對的敵人對手不是民主英國、民主美國，而是共產中國，中國共產黨鬥爭經驗豐富，冠絕全球，今天更加財力龐大，遠非1950年之中共可比，本土派頂多如孫悟空大鬧小天宮（香港），難以有成，英美歐日等國為咗中國市場，剝花生幫腔幾句，做觀眾而已，斷然不會介入香港政事。年輕人加入本土激進派之前，最緊要思考清楚end game係乜，自己是否真正願意為此犧牲一生！