【本報訊】「座落大橋之下，屹立都會中心。飽覽360°城市景色，獨享交通薈萃優勢。」這個「巧．岸居」樓盤廣告，識得笑，其實也是苦笑。30秒短片在網上瘋傳，三周就有逾22萬點擊率。其原意旨在響應伙炭藝術工作室開放日，宣傳一個紙皮製的「是彈單位」。創作團隊Paper Scissors Stone藉作品問：窮一生而不得安居，花好多時間好多錢好多青春去追夢，其實是否「好戇居」？
記者：朱雋穎
創作團隊Paper Scissors Stone成員皆為80後，是次獲網民激賞的短片，由外援好友Sky製作。低成本製作有齊高空維港景與人來人往地鐵站，除了自家拍攝，也多得網上共享影片庫。正職是IT人的Sky說，市面上樓盤廣告的共通點，在於「唔會展示單位本身結構，只會影大量環境，再用好勁嘅effect、好靚嘅字句去包裝」。
高明的廣告其實目的在引人上當到「巧‧岸居」的「是彈單位」一看。以紙皮搭建、5米乘3米的大Pop-up書，平放工作室內，一書三房，有齊一比一的客廳、飯廳和睡房。樓底無限高，摺得埋也彈得起，卻是睇得唔住得。成員阿山說，整個計劃由構思到完成花了兩個月時間。
Paper Scissors Stone成立年半，是藝術單位也是設計公司，其中阿山與Judy是全職成員，與Eva是昔日同學。打工儲了幾年錢，最懷念學生時期分組做報告的歲月，為做好作品廢寢忘餐，「一齊做我哋嘅事，好熱血，唔係人大咗就一定要成熟啲嘅」Judy說。
「可能有人會阻止你，但你亦可以選擇繼續追夢。」
不過，她也承認，這些日子過得有點辛苦，慳得一蚊就一蚊，平日與阿山兩人分享一個30元的午餐，一個月去一次有格調的餐廳，獨享60元的套餐，就覺得「好豪喇」。雖說做設計，客戶須時間累積，但看到fb專頁長期只有百多like，偶然還是有點灰心，「會唔會係我哋問題咋？」
現時平均兩個月接3張單，店租、家用、交通費，咬的是以前打工儲下的糧草，可支持多久呢？Eva對阿山笑說：「你OK我就OK。」阿山就話：「會keep住做，直到戶口得番兩位數。」試過嗎？「未！」Judy搶答。
談置業，4人都說不敢想。住公屋的阿山，家有5姊妹，全住同一房間，「好似去宿營咁，完全冇私人空間，難免有磨擦」。她算一算，以往打工一半收入給家用，餘下一半，想在深水埗租間劏房也很勉強，「仲要係唔食唔用唔搭車喎」。
Eva則說，最盡每月可撥8,000元在住屋，「但用來儲首期的話，唔知要儲到何年何日」。這麽想來，辛苦賺來的錢，她們寧可用來做自己喜歡的事，譬如去旅行，又或者開一間公司。她們說，其實最想是做藝術創作，但為餬口，也必須兼顧商業設計，「唔使賺大錢，夠食、有得做自己嘢就滿足」。
電影《哪一天我們會飛》中一句「香港唔係一個俾人發夢嘅地方」，刺中了許多追夢者，Judy扁着嘴點頭。Eva認為，香港生活壓力大，物價高、工時長，「難怪啲人冇時間欣賞身邊嘅美好」。Sky說：「可能有人會阻止你，但你亦可以選擇繼續追夢」。Judy說：「最緊要我哋團火唔好熄。」阿山說：「我哋只係想一齊好戇居落去。」