車路士上年尾炒摩連奴，唔少球迷都鬧球會冇情冇義，事關摩佬都幫車仔拎唔少冠軍；唔知係唔係想補飛，車仔就送咗對複製嘅英超同英聯盃獎盃（下圖），同埋一封感謝信畀摩連奴，叫做多謝佢帶嚟榮譽。曼聯領隊雲高爾帥位持續不穩，據報一線主力已經公開不滿佢，而任職講波佬期間一直踩雲高爾嘅名宿史高斯，竟然返紅魔鬼做教練，似乎暗示雲高爾已經失勢。
曼聯執行副主席活華特仲傳上周五同摩連奴密會，似乎想問吓佢會唔會提早出山接手曼聯。據報摩連奴已經接受曼聯開出總值4,800萬鎊（約5.4億港元）嘅三年合約，但要今季完結先肯接手，不過以𠵱家曼聯水深火熱，職球員以及球迷都想佢提早上任。