新一季日聯周六就開鑼，例牌先會上演一場前哨戰日本超級盃，由上屆日聯總冠軍廣島三箭，喺橫濱日產球場鬥天皇盃盟主大阪飛腳。上周六呢場日超盃亦係上屆日聯季後賽決賽嘅翻版戲碼，結果三箭繼續食住飛腳。兩隊上半場互無紀錄，易邊後三箭由33歲老將前鋒佐藤壽人打破僵局；加上後備入替一對前鋒淺野拓磨同新兵彼得烏達卡各建一功，以3:1擊敗飛腳，捧走新球季第一個獎盃（圖），兼攞到3,000萬日圓（約200萬港元）獎金。