巴西籍的英國冠軍騎師蘇兆輝，今季第一次來港獻技，先喺騎師賽贏「開心駿馬」，再於客串期瘋狂數糊掃走15WIN，累積16場頭馬，可謂贏晒口碑。
馬迷對蘇兆輝印象最深刻嘅地方，可能係佢同莫雷拉經常串成「森巴騎師Q」，另外初三蘇兆輝策「勇冠王」，該駒不斷內閃，蘇兆輝仍操控得到，狂鞭狂推之下追過雷神嘅「開心健康」獲勝，亦令馬迷大讚。
不過蘇兆輝話佢喺香港最難忘嘅頭馬，並非「勇冠王」。他說：「我會揀『嘉應之友』贏二班1400米嗰場，因為當日檔位好差，排12檔起步，出閘後擺喺前面走，當時二疊冇遮擋，不過隻馬直路反應好強，好早就透出，但我知道『喜蓮獎星』喺後面追得好貼，自己真係出盡渾身解數，最後頂得住贏馬，過程好驚險，『嘉應之友』鬥心真係好好，贏得好精彩，隻馬前途無限。」
可惜周日(21日)蘇兆輝告別戰，「嘉應之友」爭1800米一級賽香港經典盃，帥權被潘頓搶走，蘇兆輝呢場更坐冷板冇馬騎，隨時眼白白睇住「嘉應之友」贏一級賽捧盃而騎師不是我，有可能成為蘇兆輝離港前一大遺憾。