禮拜日田草十場賽事用全闊A跑道作賽，睇番上季經典盃賽日亦係用A欄，當日雖然有「鈦金剛」及「勁趣」兩駒於長途賽事後上贏馬，不過整體上仍以放頭馬較佳，好似「時來風送」、「金錢路」、「慣勝福星」及「酷男」放頭入直路帶到贏馬，具前速之馬匹有優先留意必要。今戰列陣馬中，八場「活力小駒」上仗於田A欄漏閘被迫留後仍可衝贏對手勝出，等番同一移欄再跑，若起步順利用回首本之均速前領跑法應可再下一城。另外，四場「多多快」上季正是於香港經典盃賽日跑田A欄快放入Q，吼準同日再來，提防又會施突擊。