消失二十年的林俊賢去年重返娛樂圈，他與中英混血前妻所生的女兒林鈺洧（Denice）同樣選擇了這條路，Denice憑34C、25、34兼43吋長腿殺入模界，做Angelababy師妹。Denice自細由媽咪一手湊大，六年前才靠facebook與爸爸重遇，Denice表示入行不用阿爸批准，但仍有求教娛樂圈生存之道。
撰文：嵐山
在80年代當紅的小生林俊賢一向好神秘，曾經歷兩次破產，又有過兩段失敗婚姻。不經不覺，林俊賢與前妻所生的女兒林鈺洧已經20歲，遺傳父親高䠷身材和靚樣，去年加入模特兒公司Style成為Angelababy和熊黛林的師妹。Denice日前在中環接受本報訪問，自覺似媽媽多一點，她說：「媽咪靚過爹哋，我成日都會同媽咪傾心事。」
「佢係冇機會反對」
林俊賢與前妻在Denice 1歲半時已經離婚，Denice自小與媽媽在英國生活，直至六年前，林俊賢在facebook尋女，兩父女重遇時感覺有點陌生。有指林俊賢不贊成女兒加入娛樂圈，還以經濟封鎖阻入行，Denice一臉不在乎說：「我冇徵求佢意見，所以佢係冇機會反對！」不過，Denice直認能挾住「星二代」旗號是很幸運，她說：「都會，不過我冇壓力，雖然我係佢個女，但工作範疇唔一樣。佢話佢初入行時都做過model，但應該畀唔到意見我。」
「行騷淨食幾條菜」
Denice擁有177cm身高，在模特兒界好吃香，但小時候Denice就好反感，她解釋：「細細個已有好多親戚話『嘩！你好高呀，大個做model啦！』但當時我覺得好煩，加上成日俾同學取笑，甚至杯葛，幫我改長頸鹿、仙人掌、燈塔等好多花名。」直至九個月前，再有親友向她推薦模特兒公司，才令她下定決心入行。
Denice入行時間雖短，但行catwalk時亦遇過難忘事，她說：「有次行騷前淨係食咗幾條菜，以為自己得，點知去到會場好凍，又要着住對5吋高踭鞋，真係feel唔到自己隻腳，覺得就嚟跌咁，好彩最後都撐住順利完成。」Denice最近還接演一部以40年代為背景的電影，問到可有叫爸爸「過兩招」？她笑說：「我會報告（拍戲），可能每個人演技有唔同sytle，佢都想我自己發揮。但佢都會畀啲忠告，例如記得帶瀉藥、帶多啲紙巾同杯麵，教我求生技能多啲，哈哈。」
服裝及場地提供：ESCADA
貝兒曾患暴食症
與Denice同門、來自馬來西亞的貝兒（Joannabelle）自小已經好獨立，未夠18歲便出來打工，她說：「屋企環境唔好，所以細細個就諗住去學化妝出嚟賺錢，點知學緊化妝就已經俾人拉咗去做model。19歲嗰時，有朋友見到馬來西亞環球小姐報名，後生乜都想試，我仲好好彩攞咗冠軍。」
之後貝兒去台灣發展，惜工作運平平，去年決心來港加入Style，她說：「喺台灣時壓力太大，試過患暴食症，肥到61kg（約134磅）。但冇耐接到一個商品代言人，個半月內要減14kg（約30磅），真係好辛苦！所以做模特兒一定要keep住做運動，我𠵱家一星期做足六日，唔可以畀自己時肥時瘦。」貝兒除了拍平面廣告外，早前還有到上海拍攝微電影，她說：「好鍾意演戲，每個角色都有唔同個性，好有挑戰性。」