電影《五個小孩的校長》賺人熱淚，作為電影藍本嘅真人呂麗紅校長（左圖）喺現實亦獲得認同，香港教育學院昨宣佈，會喺4月頒授榮譽院士畀佢，表揚佢對教育嘅熱誠，係幼兒教育界嘅模範。
當年諗住退休嘅呂麗紅，2009年聽到八鄉村校元岡幼稚園瀕臨停辦後，決定出山應徵做校長，月薪得4,500蚊。最終成功改革幼稚園，由當年5個學生去到𠵱家有60幾人。呂麗紅接受八方訪問時話，雖然唔介意有冇獎，但始終係一個認同，望鼓勵到全港教師，用教學專業服務社會係會得到掌聲，仲話由母校教院頒院士畀佢特別高興。
今次教院共頒發榮譽院士畀6人，包括正生書院校長陳兆焯（右圖）、商人陳永堅、速遞公司DHL亞太區域共同創立人之一鍾普洋、鳳溪公立學校行政總裁馬紹良，同埋特殊學校紅十字會甘迺迪中心前校長謝宗義。