又有戲院執笠！繼AMC又一城同尖沙嘴嘉禾港威執笠後，啱啱再有消息話東涌嘅UA東薈城戲院好快會消失，唔少住喺嗰區嘅網民知道後都鬧爆，事關有傳喺機場嘅IMAX影院，隨住機場二號客運大樓改建都會冇埋，即係要睇戲最近要去青衣，真係好唔方便囉！
合拍片當道
不過，馮仁昭反而擔心戲院結業潮陸有嚟，事關回歸後合拍片成風，有製作嘅港產片可以話係零，好似啱啱過咗嘅農曆新年檔，除咗西片《死侍：不死現身》，撐住個春節檔期嘅幾部戲《美人魚》、《西遊記之孫悟空三打白骨精》同埋俾網民號召罷睇嘅《賭城風雲III》，通通都係香港同內地嘅合拍片，港產片？Sorry！No！
至於喺東涌嘅UA東薈城戲院點解要執，除咗因為嗰度要改建成酒店連商場，據業內人士消息，話呢間戲院嘅收入一直都唔理想，上年叫做有啲起色，總收入有近2,500萬，但仍然係UA院線嘅戲院最差一間，究竟香港係冇人睇戲，定係冇戲好睇呢？
撰文：馮仁昭