前世界足球小姐澤穗希，最近以着住婚紗嘅造型（圖），喺一本專講結婚相關話題嘅日本雜誌封面上出現。37歲嘅澤穗希喺2011年帶領日本女足勇奪女子世盃冠軍，仲贏埋MVP同神射手獎項，到上年出山再戰世盃，可惜喺決賽輸畀美國飲恨。到上年八月澤穗希宣佈結婚，當時冇公開到佢丈夫係邊位，只係話同佢相識咗10年，由朋友變成愛侶；隨後佢丈夫嘅身份終於被公開，係曾經踢過日聯仙台維加泰嘅辻上裕章。