眾所周知，經民聯張華峰炒股好叻，不過原來黨友林健鋒都唔弱，只係佢唔聲唔聲，最近佢仲憑股市贏咗餐飯㗎。
農曆年前，林健鋒同埋佢老友、全國政協常委唐英年等一大班朋友，估吓農曆年假期後恒指過唔過19,500點。
林健鋒就好肯定話過唔到，結果一如所料，咁就贏咗餐飯。至於唐唐點睇，最後贏定輸呢？林健鋒話佢唔記得咗喇。
眼光咁準，林健鋒就分析話，其實2015年年尾嘅出口定單咁少，加上之後石油價格跌，其實都估到個市麻麻，不過八方問佢猴年買乜股好呢，佢就話自己向來唔玩短炒，佢入市前都會做足功課，了解間公司嘅業務、班底等。總之都係嗰句，力不到、不為財。