梁振英當年選特首為爭取工聯會支持，開咗唔少勞工議題有關嘅期票，不過好多未兌現，令工聯會打鑼打鼓話要追數，八方何解又提起？因為工聯會王國興（圖）噚日「宣佈」，陪伴佢接近十年嘅假腳要「榮休」，呢個又同佢終於向梁「成功追數」有關。
話說2007年開始，王國興就經常帶隻血淋淋假腳去立法會，爭單肢傷殘人士津貼及乘車優惠，梁特競選政綱係承諾「容許單肢傷殘人士申領傷殘津貼」，之後王國興都常帶住隻腳去追CY數，到今年施政報告，梁終提出優化傷殘津貼嘅醫療評估，包括刪除嚴重殘疾定義中「喪失百分之一百賺取收入能力」字眼，以及評估時不計算義肢等扶助工具等，雖然仲有關注殘疾團體批評係「縮數版」單肢傷津，但王國興仍覺得梁已找數，所以假腳將從此消失。
咁工聯會會否投票支持今年嘅施政報告致謝動議呢？王國興話工聯會仲要討論吓。咁又係，標時、取消強積金對沖統統冇影，真係支持佢唔住啦，有建制中人笑言，相信工聯會最想今個星期流會，等佢哋唔使諗點投票先唔會「又」俾人話出賣工人吖嘛。