傘後一班財金界人士組織「思言財雋」，倡改革立法會金融界及金融服務界嘅選民基礎，現正收集緊網上聯署，佢哋整咗條短片，解釋擴大佢哋兩個界別選民基礎嘅原因。原來全港有23萬名金融從業員，兩位立法會代表竟然由700張公司票代表產生，可見呢個選舉方法十分唔民主，所以金融界吳亮星，可以喺2012年因冇人同佢競爭，以零票當選。
思言財雋建議將金融界嘅選民基礎擴至金管局「認同機構證券業務員工紀錄冊」內嘅合資格選民；金融服務界嘅選民基礎就擴展至證監會「持牌人及註冊機構的紀錄冊」內嘅合資格選民，望可以畀約5萬名有牌照金融從業員一人一票選出業界代表。收集聯署後會向兩位立法會議員見面反映意見。