二月九日年初二凌晨的旺角事件，外國傳媒稱之為「魚蛋革命或魚蛋暴亂」，一位70後朋友問左丁山，「你講嘅魚蛋檔與我地街邊食魚蛋，有乜唔同，唔少街邊都有魚蛋檔嘅啫，點解學生唔去得？」
左丁山想請佢去問沈西城，沈老兄寫60年代色情娛樂場所，生猛活潑，左丁山只係有「認知」，而未「去過」，從無親身體驗。不如在此就請沈兄下次以「砵蘭街魚蛋檔」為題，寫篇過癮文章，娛樂吓讀者。
新年在馬場見到惡佬明，同佢講起掟磚頭之事，問佢點解街邊咁易有磚頭用以掟人？惡佬明話：「你揸慣筆，唔識揸鐵，梗係唔識啦。以前所有街道都係用水泥石屎鋪嘅。我地細佬哥之時，可以在莊士敦道、克街玩跳飛機。回歸之後，唔知有邊個聰明人提出，大街大巷嘅水泥石屎逐漸由紅磚或灰磚代替。點解呢，香港街道上有太多工程需要挖路鋪路，電燈公司鋪電線，挖完鋪平，又到水務工程挖開，做好後，輪到煤氣公司挖，之後係電話公司，周而復始，簡直係浪費英泥，浪費人力，成本又貴，噪音大到無倫，兼且灰塵四起，一句講晒，極不環保，不適合21世紀要求。用磚頭呢？用環保磚，容易鋪，容易挖起，在馬路去水渠邊，用鐵筷子插落空隙，就輕易挖起一塊磚頭，之後用手挖都得，慳水慳力，夠環保，又美觀，係特區政府近十幾年來推行嘅一項好政策，啲公用事業公司都唔知幾鍾意！」
哦，係噃，唔怪得皇后大道中少咗好多挖路掘路噪音，而士丹利街，威靈頓街仍然用水泥鋪，就經常沙塵四起。咁就解釋到點解在旺角街頭，咁容易搵到磚頭即刻掟警，惡佬明就話：「旺角掟磚，唔係一個好例子，因為磚頭被挖嘅地段即刻用水泥鋪番，如果我有水晶球去預測，就會預見到政府將來唔會在旺角街道鋪磚，而係用番舊辦法，只用水泥混凝土！」如果係咁，就未免係環保倒退，但警方考慮到前線警察嘅安全，又可能真係會向保安局、發展局提出如此要求都唔定。惡佬明兒子與肥仔K等一輩80後，平時鍾意去旺角流連，但自細受政府API廣告影響，怕晒街邊熟食檔污糟，絕不幫襯，對佢地嚟講，有人以維護熟食小販為藉口對抗警察，簡直莫名其妙。