唔係我求大俠馬後炮，當賽前有記者質疑基斯坦奴朗拿度（C朗）作客唔識入波搞到佢大動肝火嗰陣，我就知道呢場歐聯對羅馬，佢肯定有波入！C朗份人對自己要求好高，激將法對佢肯定有用，結果佢就轟出一球招牌式推大位遠射，幫皇馬最後喺呢場16強首回合作客贏2:0。
C朗之前有兩個幾月未喺作客入過波，有記者喺賽前記者會問佢呢件事，激到C朗把幾火，扔低一句：「我嚟到西班牙之後有邊個作客入波多過我？係冇！」講完就拂袖而去。一個射手最緊要有火，當我求大俠見到C朗黑晒面，喺記者會拎起件褸就走嗰陣，就覺得佢今場肯定踢得好。
歐聯史上作客入球王
講番場波，羅馬其實守得好好，皇馬攻咗大半場都冇入波，喺呢個關鍵時刻，賽前咀咗個女球僮一啖嘅C朗表現出球星嘅作用。57分鐘，佢喺左路帶波入禁區，面對羅馬守衞，佢使出招牌嘅左腳急停轉向，呃到對手失晒位，然後喺大位用右腳射入，幫皇馬打破僵局！冇C朗呢球，都唔知皇馬呢場贏唔贏到。其後，皇馬由謝斯洛迪古斯喺末段入多粒，以2:0贏羅馬，拎住兩個作客入球返巴拿比奴踢次回合，晉級機會高唱入雲。
施丹：最佳作客表現
C朗呢場用表現回擊外界嘅質疑，今屆歐聯七場入12球，其中作客入五球，係今屆歐聯作客入球最多嘅球員。睇埋歷史，C朗職業生涯喺歐聯作客入咗44球，係歐聯史上作客入球王，多過美斯九球。
C朗入波後第一時間跑去同教練施丹擁抱慶祝，睇嚟施丹成功收服咗C朗。施丹話：「我好開心佢跑嚟搵我慶祝，我亦為佢入波而高興，大家都希望佢入波，而佢做到！」施丹補充話呢場係佢上任後球隊踢得最好嘅作客比賽，非常滿意賽果，特別係防線冇失到波。不過，皇馬場外有不利消息，有歐洲議會嘅議員話，當年皇馬問銀行融資籌錢買加里夫巴利，但攞番嚟筆錢其實係歐盟畀西班牙嘅救助金，皇馬變相用救助金買人。
至於周三另一場歐聯16強首回合，禾夫斯堡靠達斯拿梅開二度，作客以3:2贏咗比利時嘅真特。