最近約咗一位好耐冇見嘅朋友食飯，講到股票嗰一刻，佢不禁露出一副無奈嘅表情。佢唔介意將佢個portfolio光脫脫畀我睇，唔少股票係喺大時代買入，形勢毋須多講，佢話，當初買入原因係「貪得意咋，人買我咪買咯！」
對於如何處理手上蟹貨，已經冇策略可言，我即場官方答案係「如果沽咗、股價係咁升，都心安理得，咁咪沽咯。如果死揸個心先舒服啲，咪揸咯。」講緊係面對生活挫折嘅態度而已。而為咗呢位朋友，我用咗兩日，去思考呢個世界究竟有冇懶人賺錢法，答案係……冇盡善盡美嘅方法，但可能有近磅嘅方法。
所謂近磅嘅方法，就係每次當市場恐慌之際，買入標普500指數掛鈎嘅基金，點解係美股？因為佢喺我有生以來，都能夠超長線大漲小回，係鬥長命嘅較佳對象。
如果美股都崩潰，咁點算？其實可以考慮分兩注買，如果標普500指數經歷第一次恐慌，你買，點知繼續跌，再出現一個更恐慌嘅時候，你又買，咁閣下嘅成本價，已經算相當平，除非世界金融體系爆煲，否則你長線遲早贏錢。
如果你買晒兩注，都仲要再跌，面對第三次恐慌，呢啲就叫雖敗猶榮，因為你面對係百年難得一遇嘅股災，等如你同巴塞踢波，竟然輸得少過職業足球員，咁就輸少當贏吧。
晉佳
https://www.facebook.com/advanceguy1/