麥當娜昨晚在亞博館舉行「Rebel Heart」尾場，朝聖的藝人都不少，任達華和琦琦夫婦、郭藹明、鄭裕玲（嘟嘟）、黎耀祥夫婦、杜德偉和呂方、湯寶如、G.E.M.、草蜢和伍詠薇夫婦、徐淑敏夫婦、李蕙敏、黃耀明、諸葛紫岐和老公薛嘉麟等，娜姐昨晚提早9時29分開騷，陳奕迅和老婆徐濠縈開場後姍姍來遲。
G.E.M.偷師
嘟嘟和呂方分手後，昨晚前後腳到場睇騷，連平日早瞓一族的嘟嘟都捱夜捧場，她入場前說：「我之前冇睇過，如果今日唔睇，唔知幾時有得睇，我會選擇性捱眼瞓，太眼瞓或者會早啲走。」嘟嘟到場不久，舊愛呂方孖杜德偉出現，記者告知嘟嘟同場，呂方回應：「係咩？唔知會唔會坐我隔籬，係就一齊跳舞。」呂方表示買的是二千多元票價。
任達華和琦琦拍拖到場，未見囡囡，琦琦說：「囡囡唔啱睇。」任達華有留意娜姐會遲出場，他搞笑說：「香港夜景太靚，佢噚晚做完騷就啱啱好，返酒店一邊落妝，一邊睇夜景，日頭露台景冇咁靚。娜姐啲音樂前衞、好革新。」即將開巡唱的G.E.M自爆來偷師：「我嚟睇製作同佢啲經典造型，尤其雪糕筒呀。」
蔡一傑兩晚都追看娜姐，伍姑娘爆料他花了約二十多萬追星到各地看娜姐巡唱。問傑仔如拾到娜姐拋下體味花球會怎樣？他說：「會鑲住花球，索一索。」伍姑娘在旁即預告會瘋狂。
此外，娜姐昨午4時多離開下榻的半島酒店，出發到亞博館做準備，其養子David Banda先坐另一部車離開。而娜姐出車前約兩小時，酒店後門有近十名警察維持秩序，並預告不許傳媒採訪車追趕。
採訪：馬建華、曹家誠、丁焯敏
攝影：仇志德、沈健程、潘冠恩、梁繼光