維達紙巾下個月會搞「Vinda柔韌紙巾婚紗Catwalk Show」，話用紙巾整一系列婚紗，仲招募兩個小朋友參加，有唔少家長踴躍留言幫阿女報名。不過用紙巾整咁大條裙，當然引嚟好多網民抨擊啦！話維達做大嘥鬼浪費紙巾！
網民質問維達，想向參加嘅小朋友灌輸乜概念？「廁紙可以亂用，用得越多越好？請問企業良心何在？社會責任何在？」、「全球暖化已好嚴重，但好多家長都唔care（關心）」、「完show之後係咪諗住掉晒就算？」
維達︰係生產過程耗廢物
維達搞咗咁大單關公災難，噚日下晝即刻撲火，喺facebook回應話啲紙巾婚紗作品唔只用一次，之後會安排喺唔同地方作藝術展出；又同八方解釋，啲材料其實係整紙巾過程嘅耗廢物，今次只係回收再用箒，Catwalk完咗之後會搬上大陸作婚紗藝術展，同慈善機構合作，或將婚紗捐畀內地偏遠地區、經濟又負擔唔起嘅國內同胞去租買婚紗喎……
八方就向有份設計嘅婚紗設計師Noel Chu八過，成個活動會有8條大人裙、3條細路裙，全部裙有95%成份係用紙巾材料做，其餘係布料。不過外國啲比賽整條紙巾婚紗閒閒哋用8卷廁紙，難怪綠惜地球環境倡議總監朱漢強對維達做法覺得唔舒服，批評維達使用紙巾嘅尺度過晒界，希望市民耗用資源要反思。
其實維達都唔係第一次被人鬧，去年8月喺上海搞紙巾婚紗藝術展，網民已經好有意見︰「下雨怎麼辦？方便撕？一次性？」
李八方
mailto:[email protected]