久唔搭隧巴過海，聽到後座有兩個年青真師奶細細聲討論：「佢要真暴亂，全部人中伏，689好狠毒啊。」真師奶乙答嘴：「連差佬都俾佢跣一鑊，那晚假如再激些，磚頭無眼，扑死一兩個差佬，咁就正中條友下懷，鬥爭升級，16要比67衰89倍！」「話時話，你諗住short乜貨？」「時勢咁惡，short乜呀，cash大晒。老公睇晒行情，一個字：撤！盡快套現，調走資金。」
「人同此心，銀行隨時擠提！」「因689之名，絕對唔係冇可能！」
「睇到擲磚呢一幕，我有不祥預感，磚頭是香港人上車的象徵，新年流流俾差佬和示威者互擲，樓市想唔冧幾難！銀主盤多過小販檔，魚蛋被迫再起革命！」「死人冧樓，解放軍入城，香港敗晒，樹倒猢猻散，正一倒城！王精套戲，毒過降頭！」
「差佬說，二八當晚開兩槍太少，100槍才夠！唉，我要即刻丟晒阿媽整的環保廚餘酵素，猴驚被差佬屈我屋企開武器倉！」「我家後樓梯垃圾桶這幾日塞爆晒魚生刀、火雞剪、士巴拿、電鋸、棒球棍。老公丟鬼埋我對鮮紅色尖頭斗零踭鞋！」