帶咗三個月、帶到第10場聯賽，加利尼維利（小圖）終於贏到第一場西甲！呢位原職講波佬嘅華倫西亞（圖）教練，喺上周六領軍迎戰愛斯賓奴，先失一球下靠尼格度同皇家馬德里借將卓利舒夫各入一球，反勝2:1。
一直俾華倫球迷插到暈嘅加利佬賽後話：「賽果令我鬆口氣，球員同球迷都係。我上任前球隊已經三輪不勝，我上任後就九輪未勝，我哋太耐冇贏過。」同日皇馬靠基斯坦奴朗拿度梅開二度，主場4:2輕取畢爾包。