莊思敏、崔碧珈、曾淑雅（Jumbo）、岑日珈、羅彩玲同伍倩彤噚日喺旺角為電影《PG戀愛指引》宣傳派避孕套，全部人都着得好密實，只係露腿上陣，但仍然吸引好多龍友同伯伯狂影兼攞禮物。
收埋唔怕過期
岑日珈話喺街頭派套有啲尷尬，佢話：「咁多人都有啲怕醜，感覺自己好赤裸裸。」平時多唔多用避孕套？佢話：「好少，兩年幾冇男友嘞。不過有幾個追求者，今朝仲收到99支玫瑰，晚上會同其中一個男仔單對單食飯。」咁晚上咪大派用場？岑日珈就話：「媽咪話唔可以咁隨便，呢啲收埋先，唔怕過期。」早前岑日珈自爆子宮生水瘤，佢話暫時食藥控制，3月初會做手術：「醫生叫我新年後盡快做，唞4到5日就可以。」
莊思敏就慘啲冇追求者，情人節淨係約單身朋友食飯，佢話：「兩個妹2月15日生日，但今晚唔搞佢哋，我都想快啲識個男朋友。」咁有冇擔心嫁唔出？佢就話未驚過：「今年問過蘇民峰、麥玲玲、李丞責好多師傅，佢哋都話OK，所以唔驚，我都收到神秘人送花。」
撰文：馮仁昭