情人節，梗係同心愛嘅另一半度過㗎啦，行街食飯睇戲乜都好，總之有得拖吓手仔就夠晒溫馨纏綿啦！
笑而不答點過節
嗱，有線新聞噚日就喺添馬公園採訪期間，遇到一身便服嘅特首梁振英，佢仲經過埋喺海濱嘅花海藝術裝置㖭。
之但係大家咪以為，佢喺情人節係拖住梁太唐青儀一齊浪漫行花海喎，皆因佢當時拖住嘅，其實係佢嘅愛犬囉！
唔通同疑似係齊昕最愛之一嘅Speedy行街街，就係CY嘅情人節活動？冇理由啩，在場嘅記者當然問吓CY，同梁太點過情人節啦，點知佢笑而不答，係怕醜唔想講吖，抑或唔覺得需要特別慶祝呢？
CY同愛犬閒逛期間，沿途都有警員保護，亦有市民上前要求合照以及同佢握手㖭！