上文講到貨幣信心危機，今日繼續。金融海嘯以來，環球央行進行人類史上最大實驗──量寬，用浸到上心口的銀紙，將各類資產炒上天花板，企圖以此振興經濟。7年過去，資產確係炒起過，但經濟仍在低谷掙扎，消費需求弱，通脹谷唔起，驚嘅仍係通縮衰退。聯儲局12月加息，引爆黑天鵝一號：環球經濟危機。
央行深明再印錢冇用，陸續硬推負利率，劫貧濟富兼逼銀行放貸，但銀行多年來已濫放貸，好多數收唔番變爛賬，輸到入肉仲點借？全球三分一國債係負息，但資金繼續湧入，正因冇好嘢投資，寧輸少當贏。黑田推負利率時，yen係119，家陣係112，越壓滙價越升，反映市場唔再聽央行支笛，黑天鵝二號：央行信心危機爆發。3月歐央行放唔放水，市場呢一巴注定硬食。
黑天鵝三號亦在醞釀：歐洲銀行危機。風眼源於一樣名為CoCo Bonds的複雜衍生產品，令金融股陷入死亡螺旋。買滙控（005）收息養老的日子早已過去，即使只求抗通脹保本都費煞思量，究竟啲錢擺喺邊先安全？
魏力
http://www.facebook.com/2012jason
本欄逢周一、三、五刊出