入行13年，現年27歲的文詠珊（Janice Man），由昔日𡃁模蛻變至今，越來越有女人味，最重要是終於找到Mr.Right，與任職黑石集團（Blackstone）筍盤男友吳啟楠（Carl）拍拖一年多，發展穩定。JM日前接受本報訪問，更冧爆向男友講愛的宣言：「好多謝佢一直支持同包容我，搵到呢個人好唔易！」
笑問JM知否父母對「未來女婿」的評價是否都很好？JM即笑着關後門表示未有婚期：「咁又冇咁快，我哋𠵱家目標一致，男友相比起我更加係工作狂，影響到我更勤力，佢無時無刻都諗做嘢，係唔會浪費時間嘅人，好值得我學習。」
今年是JM與男友吳啟楠（Carl）共度第二個情人節，不過目前身在內地拍劇的她，要在工作中過節，她說：「其實上年大部份時間都喺內地開工，因為剛剛開始拍內地劇，係會少咗時間喺香港，男友都明白。」
下一站女主角
另外，JM前年約滿黎明公司改投太陽娛樂兼自組經理人公司，今年她憑電影《赤道》提名金像獎「最佳女配角」，成功「打」出頭來。JM回想得悉入圍一刻，自己是出奇地冷靜，她說：「可能我一直都抱平常心，反而家人就興奮到尖叫，不過我可以入圍係《赤道》成個團隊嘅功勞，係我人生突破，唔會畀自己壓力，因為越期待會令自己緊張，反正入圍已經係好大嘅禮物。」
問JM下一個目標是否挑戰女主角？她承認演員一定有這個想法，但不會給自己壓力，只希望收到更多好劇本可以發揮。
採訪：鄉奈仁
髮型：Matt Chiu of Xenter
化妝：Vinci Tsang of VW makeup
服裝：Michael Kors
首飾：Forevermark
場地提供：NeighborFarm CoWorking Business Centre