中國廣義貨幣供應M2由2009年至今增加逾兩倍，美國連環QE後，同期M2只升五成多，兩者分別在於金融海嘯後，美元供應增加，但海外銀行卻將貨幣作儲備而不外借，乘數效應（multiplier effect）減低，所以美國M0加得快、M2加得慢。至於中國喺M0供應大增嘅同時，內銀仍然有幾多借幾多出去，一來滿足貪官胃口，二來銀行信中央必定打救，三來有剛性兌付，人民唔介意以任何方式將錢放喺銀行體系滾存，令M2急升。
內地資本賬極有限開放，人仔超大供應仲要困死喺內地，喺無限金錢追逐有限資產之下，令內地房價同A股貴一貴，加上人行干預滙價，人仔早年只升不跌，貴上加貴，從資本賬角度，外資根本唔會願意以現時人仔滙價，入去中國購買資產。人仔升值時，外資揸中國資產相安無事，但人仔打破必升定律，對外資嚟講，就等如熊市一期殺到，唔走就傻。
從貿易賬角度，人仔唔算高估得太離譜。貿易賬幾乎全面開放下，中國境內對外提供部份產品同服務，仍有比較優勢（comparative advantage），例如部份高增值工業同唔包知識產權成本嘅淘寶產品。長遠嚟講，唔係所有內地企業股票都唔買得，不過要收窄至貿易層面競爭力強嘅公司，除咗舜宇（2382）外，未來要繼續發掘。
晉佳
https://www.facebook.com/advanceguy1/