雷神、蘇兆輝同莫雅，做咗本港馬圈猴年三大殺手，年初三11場賽事，有八場由佢哋瓜分，這天情況雖則冇咁誇張，但佢哋都繼續有贏馬。
當中莫雅跑到第七場二班草地1200米鄉議局九十週年盃，在蔡約翰支援下，接手四歲新星「華恩庭」，結果無驚無險後上一攻而破，贏個多身位，單Win及組合獨贏A1，分別派44及13元。莫雅既完成個人七個賽日連捷，亦幫蔡約翰馬房連同第二、三場連勝蘇兆輝「乘勢好運」及雷神「魔連奴」在內，食出大三元，進一步擴大練馬師榜領先優勢，以36比27win，領先沈集成9場。
「華恩庭」上次因雷神停賽換柏寶捧走皮亞士盃，今勻雷神繼續走寶，應承苗禮德騎「酣睡密碼」在先而放棄「華恩庭」，令莫雅有幸接手，並令呢匹馬壇新貴取得今季第三捷，贏埋鄉議局九十週年盃。
今場柏寶座騎由一哩縮跑番短途的大熱門「幸運如意」後上入Q，相反雷神策「酣睡密碼」末段力弱僅得一席季軍，全場最熱三駒包辦三重彩，第四名由169倍「陽明囍囍」拎到，四重彩派6,655元。