噚日初七人日，鄉議局一如以往舉行新春團拜，人稱發仔嘅劉皇發公子劉業強，今年第一次以主席身份致辭，其間主動提到組黨，但唔少鄉紳封口不談，似乎時機未成熟噃！
現場其實有一個「特別嘉賓」，就係前港姐鄭文雅都現身，皆因佢係鄉議局90周年慈善大使，身為新界人嘅佢自然義不容辭幫拖，佢同發叔囡囡劉玉蓮、發仔太太葉愛愛一齊着到紅噹噹，成為現場人士集郵對象。
發叔冇返屋企過年
團拜之後，鄉議局中人轉戰沙田馬場出席一年一度嘅鄉議局盃，適逢今年係該局90周年，所以冠名為「鄉議局90周年盃」。大會特別向鄭文雅送上驚喜，皆因噚日除咗係情人節，亦係鄭文雅牛一，由劉皇發外孫余一言代表送花兼祝壽，加上老公陪伴在側，真係冧到爆。
發叔今年抱恙冇出席，發嫂話原本發叔想返屋企過年，但見天氣凍，發嫂唔批准，希望過埋人日之後，可以接佢出院啦。向來熱愛賽馬兼係馬主嘅發仔，賽前畀貼士，叫大家買1號華恩庭，果然跑出冇甩拖。