寒冬下，身上包住親手織嘅衣帽同圍巾，一定暖笠笠。扶老慈善基金屬下嘅義工組織「編織天使」亦想全城暖到爆，除咗透過商業機構贊助毛線，由基層婦女義工織成各樣衣物，喺冬季捐畀長者同有需要嘅人士外，去年更增強服務模式，除咗募捐義工嘅編織衣物，仲會將編織品義賣，所得善款用於買食油同食米等物品，送畀社區上有需要人士。原來呢個組織不時開辦編織興趣班，最重要係學員對編織有興趣，認同服務人群嘅信念兼有使命感。佢哋早前仲同柴灣青年廣場合作，教導學員編織咖啡杯套用嚟義賣籌款。