年晚收爐，全城焗賭，王精呢條賤精，有無機會再騎在香港市民頭上，得戚毒舌贈興：「一早睇死你班契弟，話杯葛得個講字，結果我咪又係攞晒彩！你哋呢班無樓無嚐過20歲成名滋味的廢青，用吓腦啦笨！」俾錢入場受辱？港豬們，是不是小頭症！
開車前咪飲，買飛前咪忍，相同價錢，睇「十年」和「沽注一擲」遠離被屈被抽水。後者重演08金融風暴，橋段到位，似曾相識。羊猴風眼已經成形，香港正刮烈風，專家說等於12號風球。你還賭？做硬大鱷點心！香港賭徒多，買大細剝花生是主流，主流一冧，死傷慘烈。
豪賭香港儲備，雖然鋪鋪冇小市民份，大家還是補定課，揀啱題材，迎猴而上，花果山百年不遇會結霜，你比楊局長眼尖，真係見過！馬騮就算葉問上身，都會在沙宣道PK跣腳，露出屎忽。
戲迷注意，強力部門套「第二波」「第三波」正在排期上畫。另一套「等埋西環」由民X聯包場招呼愛字頭。深圳製作老翻「死侍」叫「猴擒狼大戰葉瘤mink」，「來自禮賓府的你」未拍已經被打五星兼列為三級。
大家擔定凳仔。