話咁快，下星期就到農曆新年假，各位學生哥「準備」好未？係香港，中學生lunch通常都係出去食或學校規定訂飯，自己帶飯未必算多；係日本，媽媽整便當畀仔女帶返學校lunch就普及得多。話說日本有個高中女生，最近就係網上分享一輯便當相，全部都係過去一年佢媽媽親手整的，背後仲有段故，原來佢媽媽因為知道個女唔鐘意返學，於是呢一年不斷整唔同的卡通便當俾個女帶返學校食，藉此鼓勵佢堅持返學，所以幾時都話「世上只有媽媽好」。
日本有位高中三年級女學生，上星期如常更新自己的twitter(@kxqrx)，今次就分享一堆手作卡通便當的相片，有多啦A夢、熊本熊、Hello Kitty、麵包超人同史路比等等，陣容星光熠熠，原來全部都係佢媽媽親手整的。
呢位女學生仲寫咗個message鬼死咁感動：「今日，呢個係高校生活最後的便當。我曾經講過『唔鍾意學校、唔想返學，想退學』，一年來多得媽媽每朝都精心準備公仔便當畀我，每日都好期待打開便當的蓋。」有啲便當仲會用紫菜砌成一啲打氣鼓勵說話，例如可能知個女當日唔開心，就有「Are you ok」、「笑吧」等字樣，所以囡囡係最後一日上課日，就將呢啲便當同大家分享，襯呢個機會衷心感謝媽媽：「我希望將來成為好似媽媽一樣的人。」
資料來源： https://twitter.com/kxqrx
記者：余瑋
圖片為網上圖片