「一頭蠻牛 返銀行竟成為一頭蠻牛」係呀，又係我，即係早兩日，怨恒生（011）慘在有個爛賭老母嘅恒生小薯。聽講唔少同事睇到我篇心聲文後，都睇到一殼眼淚。呢啲時候，真係「哭泣聲絕無意義」，因為更灰嘅事陸續有來。
話說自從恒生被迫凍薪消息星期一公佈後，公司上上下下，士氣已經跌到落谷底。講真，就算你博命為公司死做爛做做隻牛又點？倒頭來咪又係貼錢畀阿媽，幫滙控集團（005）填數！好揀唔揀，揀農曆新年前同我哋開年，你唔係仲覺得我哋會快快樂樂跑數去嗎？
更加正嘅係，噚日前綫所有同事，都突然收到來自「分行一姐」Peggy姐（分行網絡業務主管譚麗琼）嘅新年禮物！登登登登，就係「笑．口．棗」一包……仔！以前從來都冇收到呢啲門面嘢，今年一話凍薪，就派呢包嘢俾我哋。真係多謝晒！
好衰唔衰，上面張貼紙仲貼上鼓勵金句，金句有幾款，其中一句係「猴年萬事好，工作無煩惱」，睇到真係眼火爆，你將業績反映喺我份人工度，我煩惱咪少啲囉！仲有一張係「健康財富 日日增值」，車！我夠幫你間公司增值啦，增值完你咪凍我薪，凍完我又要我增值，你咪好着數？我相信Peggy姐真係一片好心嘅，佢都係受害者，但喺我眼火爆之時，畀呢包咁嘅嘢我嘆，我又真係覺得似攞景多啲。
你知唔知有乜灰過，交到數但冇得加人工？就係喺呢個人間悲劇出現之後，你仲要chok個歡樂mode，快快樂樂多謝老細請你食「笑．口．棗」！真係喊出嚟。又真係唔知邊個天才發起，話個個都要影相或拍片send返俾Peggy姐同佢講「多謝」！媽呀！咩料呀？！！！患上斯德哥爾摩症候群呀？OK！Fine！鬼叫我受人錢財，替人打工。人在江湖，身不由己，就算更唔開心，我都要講：多－謝－恒－生－不－炒－之－恩－，－只－係－凍－薪。
聽到外邊啲人大讚恒生員工有Guts，竟然夠膽搞按章工作。老實講，吉咩士呀，其實根本冇人認真發起按章工作。你估我哋唔驚咩？驚到瀨屎呀！所以𠵱家只係大家各自修為，低調按章咋，平時可能會OT到8點先收工，𠵱家咪最多做到「三條五」，即係5點55分執嘢走準時收工，當係抗爭咗㗎𠵱啦。不過客觀啲講，我唔明，準時收工唔係應份㗎咩？香港人幾時準時收工都要抗爭？呢個世界係咪Short咗。
講起工會我就火都嚟，真係講到口都臭，滙豐香港上半年貢獻集團45.7%利潤，但全體員工，連帶唔關事嘅恒生都要凍薪；不過呢，滙豐英國因為有工會fight，噚日竟然公佈可以加人工2.2%！有冇天理？呢啲係咪叫人善被人欺。我哋乖乖地打份牛工，就要俾人剝削；人哋交唔到數之餘又夠惡，就有得加人工，咩世界？
又話說，瑞信全球裁員4,000人並減花紅，但香港業績靚，所以完全唔受影響。嗯，農曆新年到，新一年，希望大家見到我時，會向我或者其他滙豐、恒生同事送上一句祝福，就係「多勞多得」。
完
千頌C
http://fb.com/winbigwok