學生H有位中學同學受工程師父親影響，在大學攻讀結構工程，似乎會沿住父親嘅專業向前行，但年輕人有不少讀環境、社工、文化學系嘅同學，日常聚會不時講起維護環境，反對發展新界東北，啱啱又話討論一個「守護大嶼聯盟」，令工程學生返到屋企就同老頭子爭論「發展是否硬道理」。1月30日，佢讀咗信報一篇「發展非王道，低配是人生」（作者方立祺），覺得幾有道理啫，同學生豪討論，學生豪對呢啲事平時不甚了了，走嚟問左丁山點樣解讀方立祺呢篇文章。左丁山並非好得閒，不過學生豪既是家族後輩，於是亦都將篇文章細閱。
方立祺提供線索，於是上網好快就搵到愛爾蘭裔作家Eamonn Fingleton於2012年1月6日在紐約時報發表嘅長篇評論，The Myth of Japan's Failure，方立祺文章之數據就係從此文而來。呢位F先生在1988年娶咗一位日本女士，對日本甚有研究，一直係日本粉絲，曾預言日本經濟會超越美國，當然錯到離譜。但佢嘅立論係從「反市場主義」嘅角度出發，時下香港不少甚麼反發展嘅關注組亦然，方立祺君似乎係同一陣營。
日本社會自1980年代達上巔峰之後，1990年，日股市地產爆破，至今26年，未回復當年水平，物價水平亦似26年不變，全無通脹，日本政府最近推行負利率政策，對抗通縮危機，可見對經濟增長之緩慢，已無計可施，好彩日本嘅「共識社會」有一個好處，就係在繁榮時期（1960-1989）日本人儲蓄率高，有「終身受僱制」，財富分佈比較平均，正是藏富於民，現在就係全國老人靠退休基金養老，所以生活仍然安穩，於是引起Fingleton及方立祺等同情者嘅注意，認為發展非王道，日本提供咗另一條極低增長，並無不妥路線；有一啲台灣青年亦認同，以為在台南開咖啡店，不與中國大陸搞自由貿易更好。實情「不發展」只係對「老人家」「上岸者」幾好，對工程系學生、學生豪等下一輩及已失業人士就非常不妙，日本過往26年曾有不少大商社職員被裁，以後再搵唔到工作，被逼露宿街頭，新宿車站及大阪車站外，睇見就心酸。香港人如方立祺等可「扶老攜幼身在日本，遊日成為過去數年最佳節目之一，無他，價廉物美，山明水秀，人少服務佳。」對此左丁山深有同感。之不過，肥仔K聖誕時去日本，見番啲早稻田同學，就聽到怨聲載道，因為嗰班名牌大學80後，八年來薪水未加過，生活費用僅僅夠，完全冇錢出國旅行，對佢地嚟講，不發展便沒希望！