有實力、有人氣花旦小生，近年相繼離開大台搵真銀，今次又多一位視后決定約滿離巢，多次傳出同男友羅仲謙拉埋天窗，兼日前被指摸龍床想生B嘅楊怡，有報道指佢將於下月初約滿離巢，大台其實有意留低佢，兼且搵嚟三屆視帝羅家良去利誘楊怡留低，不過套劇就喺佢約滿先開拍，所以變相要佢續約先演出到，不過最終楊怡都係推咗新劇堅決離巢，並傳出雙方關係變僵，更令佢同郭晉安主演嘅《末代御醫》被突然抽走。
《末》喺去年節目巡禮時係推介劇之一，點知巡禮後一個月，突然有消息指《末》、胡杏兒主演《巾幗梟雄之諜血長天》、陳敏之嘅《性在有情》、陳慧琳演出《波士早晨》同馬國明嘅《流氓皇帝》齊齊被抽起，對此決定，助理總經理杜之克回覆雜誌查詢指「只是製作上有調整，不會無限期雪藏。」
面對種種傳聞，楊怡以短訊回覆周刊表示的確推咗新劇，本身都覺得可惜，亦好想同羅家良合作，但仍在傾緊合約，想為未來好好考慮同唔想太急作決定，至於《末》被抽起，佢就指被抽起唔只一套，唔會覺得係政治犧牲品，但可惜一定有，都係觀眾損失。同劇中主演嘅郭晉安覺得公司有公司決定，相信之前喺節目巡視介紹過，套劇唔會唔播。講到套劇會否係政治犧牲品？佢指自已只係做好本份，不過自己都想《末》盡快播。
製作資源部總監樂易玲指一直有同楊怡傾續約嘅事，連杜之克都有同楊怡傾，對於《末》片被抽起，佢指唔會啩？排片係節目部負責，詳情要問杜之克。