3D賀歲片《西遊記之孫悟空三打白骨精》今日上映，焦點除咗落喺孫悟空降服白骨精上，其實唐僧、豬八戒同沙僧三師徒都好有驚喜，佢哋抱住「可偷懶、可貪吃、可溝女，唯獨不能殺生」嘅信念往取西經。
唐僧今次交畀馮紹峰主演好有新意，唐僧往往畀人老正嚴肅，但馮紹峰演嚟添上點點搞笑，特別可愛。先解構佢造型，有別傳統披紅色袈裟，戲中唐僧袈裟係藍色，佢沿途向徒弟訓示向善，即使說教起嚟唔沉悶。馮紹峰喺拍騎馬戲時仲發生墮馬意外，人仰馬翻，劇組將佢送院急救，醫生診斷骨裂必須瞓床休息至少兩個月時間，可能真係唐僧保祐，結果馮紹峰休息咗僅15日就帶傷復工，呢份專業精神獲眾演員佩服。
小沈陽扮演嘅豬八戒，同埋羅仲謙扮演嘅沙僧，堪稱活孖寶，佢哋演起嚟充滿喜感。傳統豬八戒係醜惡人物，但小沈陽將呢個角色變成一隻不一樣嘅「豬」，有時係豬樣，但有時又係美男子，交替出現。小沈陽自爆接演豬八戒時曾猶豫，佢於是向電影《西遊記》演過豬八戒嘅馬德華取經，前輩鼓勵下，小沈陽開竅：「他叫我大膽去演，我是心裏邊沒當自己是豬。」
沙僧同樣反傳統，特效化妝總監Shaun Smith幫佢設計咗青筋爆肌造型，一身藍皮膚，藍得嚟好似阿凡達，羅仲謙形容佢演嘅沙僧帶住一股傻氣，從沒拍過打戲嘅佢，仲要應付連場動作戲，好彩有運動細胞，身手唔錯，完全考唔佢。