行年宵都可以話係高官近年必備行程，食物及衞生局局長高永文噚日下午就「微服出巡」，去咗維園年宵行咗個半鐘，無可避免成為市民集郵對象。身為皇仁仔嘅佢，梗係要去皇仁書院嘅攤位「美猴皇」打吓氣先，班師弟即刻捉住佢力sell產品，民望高當然好識做，先戴上馬騮造型手套做「生招牌」，又selfie又大合照，最後梗係真金白銀買買買啦。
行完一輪乾貨攤位，民望高就轉去濕貨攤位揀花，竟然偶遇「六合彩之父」夏春秋，二人少不免寒暄兼合照。民望高最後買咗各式猴子飾物、揮春、電動頸枕同傳統小食，仲有蘭花同百合等鮮花過節，埋單4,300元，檔主們真係多謝晒腦細幫襯。