太古地產（1972）噚日公佈最新一批「Blueprint」創業加速計劃嘅Startup公司，幾間獲選嘅Startup老闆異口同聲話，成個計劃最正係太地可以提供business network，容易吸引投資者注意。
呢個計劃由前年推出，今次去到第三輪，共有10間Startup公司入圍，太地喺康和大廈撥出一層畀佢哋免費用半年。
其中一間「Ting Park」將於月內推出一個實時泊車資訊應用程式（App），老闆蕭銘漢介紹，個App可提供各區停車場嘅實時空置車位數目與車位位置，仲可以提醒車主攞車。佢哋暫計劃先喺太地旗下停車場安裝感應器，希望將來擴至各區。
另有Startup針對購物市場，Claudia與兩位朋友一齊創辦網站Clozetto，提供一個平台畀鍾意shopping嘅人，可以夾單合購攞折頭買心頭好，仲可以分享用後感㖭，平台開設近3年，家陣有接近8,000個經常用戶，九成都係30歲以下嘅女性。