農曆新年在即，不如寫啲風水八卦嘢。里昂每年都出風水指數，上周魏力都有去聽吓，發現去年先高後低都貼得幾準，今年佢哋就話，火猴年呢隻馬騮會跳來跳去，寓意個市勁蠱惑估佢唔到。年初至今港股大插，里昂就貼首季反彈，3月見全年高位，6月就係全年低位，之後都係反反覆覆。對番里昂報告，今年該行目標24000點，跟足的話水位有25%，係就真係唔錯！
上周「中國梅鐸」黎瑞剛以旗下CMC Holdings，入主美克國際（953）成大股東，持股29.55%，查番CCASS，易手價每股1蚊，現價買仲平過黎生，理論上防守性高。CMC為黎氏任董事長的華人文化產業基金旗下公司，美克日後有望獲注電影、電視等文化產業項目，身價估值可大幅提升。
CMC頗為猛料，2012年與美國夢工場合建「東方夢工場」，旗下湖南衛視《超級女聲》紅遍全國。值得留意，黎氏去年底獲委任為中國足協執委，而習總喜愛足球亦是人所共知，美克如能變身足球產業股，前景亦可看高一線。
魏力
http://www.facebook.com/2012jason
本欄逢周一、三、五刊出