曼聯最近戰績又好番，不過領隊雲高爾嘅帥位依然係一步一驚心。日前英國傳媒又指雲帥嘅最大靠山，行政總監活華特都唔再撐佢，同意喺今夏提前結束合約，聘請摩連奴執教。雲高爾去定留嘅報道睇怕都會傳不停，而球會近期都遇上另一個尷尬情況；月尾歐霸盃32強次回合主場迎戰丹麥球隊米迪蘭特，似乎叫座力真係麻麻，波飛銷情唔理想，據講球會到時會關閉以費格遜命名嘅嗰一邊看台。