一月二十八日本欄講香港缺乏展覽場地，有提到「搞結婚宴、學校慶祝50年、100年，或書畫展而去到機場，簡直係同人客開玩笑啫。」
機場亞洲博覽館嘅公關Agnes Chan睇報紙幾細心，日日閱讀「GG細語」，閱畢上文就來電郵，要求澄清，Agnes附寄資料嚟。
「亞博館的使用率在過往數年不斷增長，自2010年起連續六年錄得雙位數百分比的業務增長，除了展覽、會議、演唱會等，宴會聚餐也是重要一環，一些活動更包含以上多項形式。如去年Samsung的活動，展覽、會議、宴會同期在亞博館舉行。
學校聚餐方面，除了德望學校於亞博館舉行60周年晚宴慶祝外，還有聖公會St Stephen Church 150th周年晚宴等，這陣子更是annual dinner高峰期，很多大公司如DBS、Nestle、Sa Sa、金門、AECOM等，也擺二百至三百六十圍不等，亞博館亦請了很多東涌居民當兼職員工，促進大嶼山的GDP。
此外，2016年7月，聖保羅男女書院會在博覽館舉行100周年校慶匯演；2009年11月28日培正中學在博覽館舉行274席盛大晚宴，慶祝120周年校慶。」Agnes話博覽館場地大，擺酒二三百圍絕無問題，到機場博覽館參加宴會，絕非與人客開玩笑喎。
係嘅係嘅，左丁山顯然低估咗香港對盛大場面宴會場地嘅需求，一個灣仔會展中心，絕不夠用，去博覽館係唯一嘅Plan B，甚至係Plan A，故此左丁山經常話香港之「體積容量」，已到極限，非擴建發展不可。
講到擴張，近日午飯後周圍行，呢日行到蘇杭街，見到崇基校友Joseph Wong（黃志煒）間曲奇店，唔知到係唔係年近歲晚，店內人客不少。呢間曲奇店Cookie Galerie（曲奇薈）由阿Joe創辦，事出偶然，事實上佢係「半個」音樂人，曾任職香港管弦樂團做市場推廣，又做過李雲迪、孔祥東、呂思清等音樂演奏家嘅經理人，自己就跟名歌唱家李冰女士之丈夫學唱男高音，因為平時鍾意去到邊食到邊，最好嘗試新款曲奇，食得多，居然膽粗粗放棄音樂推廣呢一行，與別人夾錢開曲奇店，但做生意呢回事每每係「相見好，同住難」，經過教訓之後，索性自己獨資經營，初試啼聲，就有成績，於是把心一橫，一於在零售業一片不景氣之際，逆市擴張，發大嚟做，近月先後在中環萬年大廈、銅鑼灣利園山道、尖沙嘴K11連開三間分店，左丁山知道後，叫人傳話俾呢位師弟：「唔好太勇！」得到嘅回覆係：「趁勢出擊」！因日本旅遊指南RuRuBu點名推薦俾日本遊客喎。既然如此，左丁山無謂阻人發達，希望呢位中大師弟行運大展鴻圖啦。