送羊迎猴，心有千千結。通常，去拜年或被拜年，不談政治最好，嘻嘻哈哈風花雪月，盡量減少「開年」的機會。不過，香港正值政治氣氛最差的一段時間，是禍躲不過，長輩表親硬要同你開波，你最好都有心理準備。以下有些參考資料，袋定喺袋，冇壞。
「陳健波好嘢呀，港珠澳大橋要快啲起好呀！」
介紹番，港珠澳大橋工程，至今導致6死129傷，新正頭真係唔好死死聲，不過乜都未搞清楚就復工，大吉利是講句，呢條就嚟變鬼橋啦！至於陳健波……三叔，都話新年流流唔好講啲唔吉利嘢啦……
「使多五十幾億，港珠澳大橋實賺得番。」
港珠澳大橋造價1,177億，2005年政府報告預測通車初期每日有一萬架車使用，但最近連大陸學者都認為冇可能，回本根本唔使諗。加埋大橋保養維修同利息支出，每年唔蝕幾億都偷笑！你仲未計到時多咗大陸車落嚟香港橫衝直撞喎！表姑媽，你又唔係唔知你行得很慢，我擔心你到時過馬路……
唔通由得高鐵爛尾咩？
高鐵再撥多196億，話就話封頂，不過官字兩個口，再延期你估到時冇新花臣叫你磅水？仲有，你估起好就賺錢？政府一直隱瞞高鐵上廣州原來要停中途站，根本就唔快得幾多，票價高嘅話根本冇吸引力，票價低又回唔到本。姨丈，你哋做三行嘅，啱啱先有行家追加工程費，隨時比海關拉，但又點解覺得可以任由港鐵宰割呢？
「唔會嘅，啲高官識嘢實多過你啦，佢哋真係為香港好！」
當年力推高鐵個鄭汝樺，即係你最尊敬嗰啲高官呀。佢當年話高鐵唔會再超支，2015完工，48分鐘直達廣州，全部都冇實現到！唯一實現嘅，就係佢一個屈尾十做咗中銀非執董，即係高鐵嘅貸款銀行。佢賺非執董份人工好和味，中銀賺利息仲和味，犧牲香港人箒，佢哋冇所謂。
「飲完茶，去睇《××風雲3》。」
阿表弟，攞番封利是嚟，我今年決定唔派畀你。
Profile：柳俊江
前新聞記者，動物NGO工作者。現為自由傳媒人兼「另類生態學家」，透視傳媒生態、動物生態、社會生態。《反智動物》討論最高智商靈長類動物之種種反智行為。
編輯：黃仲兒
美術：楊永昌