為咗選票，可以幾盡？立會新東補選過完年冇耐就會舉行，候選人都各出奇招搶曝光，先有新思維黃成智一批疑似七月十四主題嘅詭異橫額宣佈撤回，仲特別開記者會宣佈；另一候選人、報稱獨立嘅西貢區區議員方國珊則喺噚日，連自己嘅「八月十五」都出動埋，將上載fb開心些牙（圖）。
雖則嗰一線「月光」唔算香艷，卻算係瞓身拉票經典，皆因方國珊上載嘅呢張相片，係近鏡zoom埋pat pat位置，條褲有大大條裂痕，一絲月光乍隱乍現，佢仲留言玩「食字」：「『破褲』破斧（釜）沉舟，八月十五慘露肉見人！大家明白我參選嘅決心﹗」唔知新東補選其他候選人，包括楊岳橋、周浩鼎、梁天琦、梁思豪同劉志成，驚唔驚呢線「月光」嘅殺傷力？