講起徐子珊、邵珮詩與麥明詩三位分別喺2004、2014同去年贏得港姐冠軍嘅靚女，佢哋有一個共通點，就係同樣由資深細價股投資者詹劍崙嘅太太李凱琪（Clara）訓練兼提名，三次提名都中，可謂無寶不落。問佢有乜心得，Clara就話「靚係冇標準」，最緊要身型合比例、有自信。
Clara喺加拿大英屬哥倫比亞大學（UBC）讀國際關係，佢跟詹劍崙由大學開始拍拖，婚後育有一子兩女，大仔都21歲，佢依然保養得宜，現從事品牌形象工作。
包括 麥明詩 徐子珊
佢謙稱，對branding「有啲天份」，訓練港姐與branding道理相通。佢一係唔出手，一出手訓練嘅女仔都摘冠，包括徐子珊、邵珮詩與麥明詩。佢坦言「Triple crown winner唔係符碌」，年中有唔少人希望佢幫手，「我要做好多due diligence，要了解個女仔目標」，對方要諗清楚有乜抱負，要想透過選美咁特別嘅經歷去達到。
通常遞報名表前，Clara已經幫對方執過晒形象，即使天賦好，都要透過化妝、髮型、衣着突出優點，切記「唔係要Beauty queen，最緊要decent」。facebook消毒當然亦唔少得。
由於Clara只係用公餘時間幫手，所以佳麗幾忙都要交功課，主動剪報，讓佢知道點樣幫佢哋隱惡揚善，見招拆招。
除咗外表，佢認為女仔亦要多留意時事，要放眼世界，有內涵先可以同人有話題，「唔能夠成日講美容」。
一直有公司搵Clara做傳訊、人事訓練，亦有人提議佢設立「港姐學堂」，Clara話唔排除任何可能性，不過之前同三名港姐冠軍相識都係緣份（例如詹氏夫婦睇住邵珮詩長大），暫時都係順其自然咁話。
李華華
mailto:[email protected]