特步（1368）首席財務官（CFO）何睿博認真唔話得，噚日佢為咗介紹公司新產品，自己做埋模特兒，着住一件以無縫技術製成嘅新tee，盡晒力狂谷胸肌畀傳媒影相，不過可能因為佢塊面比較圓潤，感覺上佢似好肉地，多過有胸肌咁囉。
話說何睿博噚日同埋老闆、即係公司主席丁水波講解未來發展計劃，何睿博原本着住件風褸，冇乜特別，點知去到尾聲，佢忽然除衫（除件風褸啫），話要展示新tee。
為盡情展示件tee嘅優點，佢就出力谷胸幾分鐘，畀傳媒影相，影完相，佢即刻笑住話：「終於可以呼吸喇！」咁瞓身嘅CFO，真係去邊度搵呀！睇番資料，49歲嘅何睿博加入咗特步都有8、9年，2014年年薪250萬元人仔，丁主席可能要考慮加多啲花紅畀佢喇。