郭富城、鞏俐、馮紹峰主演，由鄭保瑞執導嘅3D賀歲片《西遊記之孫悟空三打白骨精》會喺下月4日喺香港上映，套戲落重本用咗4億人民幣製作特效鏡頭，難怪3部華語賀歲片當中，IMAX剩係揀呢套戲獨家合作，日前電影公司仲掟咗成百萬畀城城拍《西》片主題曲《就是孫悟空》MV㖭。
原本喺上海忙拍戲嘅城城，呢輪為咗幫《西》片拍MV同做宣傳，佢都向戲組請咗假專程返香港拍MV，拍攝當日，城城想以一個時尚型格嘅現代版孫悟空出現，用咗兩粒鐘去整個金箔悟空頭出嚟，然後同一班馬騮形態嘅男舞蹈員一齊跳舞。
猴王上身多主意
跳跳吓城城又想搵啲嘢揸手，又叫人班咗支金剛棒到現場，佢揸住支金剛棒隨住音樂舞嚟舞去，效果又出奇到地好，城城笑笑口話：「拍《三打》時，練揮棒都練咗成個月，所以點會唔識控制呢支棒？」
城城又話相當喜歡呢首主題曲：「當唱到『不妥協不解釋的孫悟空時』，自己都有一份共鳴同感動。我對呢部賀歲片好緊張，因今年賀歲檔好多勁片，係一場硬仗。」而喺大年初三佢會喺沙田馬場舉行嘅農曆新年賽馬日同市民拜年，大派利是同送出賀歲片《西》片戲飛。
撰文：馮仁昭