渣馬啱啱落幕，喺又濕又凍下堅持跑足全程嘅跑手，成功感應該滿瀉。中文大學善衡書院同基督教正生書院去年11月首次組隊，10名師生飛到發源地雅典參加「原始馬拉松」，全員完成42.195公里賽程！
19歲嘅謝德衛Wilson係正生中六生，佢話入到正生冇乜娛樂，開始同師兄一齊跑山，起初跑步係為咗跑得快，跑跑吓反而想等埋同伴，互相打氣撐足全程。
今次雅典參賽，Wilson受腳傷影響一度想放棄，中途見到隊友、中大嘅阿樺同樣因腳痛邊行邊跑，於是兩人肩並肩跑到尾。一齊出戰嘅善衡中醫學生張健朗就話︰「跑得快要靠自己，跑得遠係靠朋友。」
同樣有去雅典跑嘅正生校長陳兆焯話，願意等埋同伴，搵到人生速度，先係跑步最美麗嘅事。