全城facebook前晚開始畀毛記分獎典禮瘋狂洗版，個個仲加多句「#多謝Shell」，多謝佢嘅贊助令個Show搞得成。雖然一面倒畀Like，但有NGO一於少理，喺fb大數Shell嘅惡行。
綠色和平香港噚日貼出寫住「#如果Shell真心守護北極」嘅北極熊相（圖），指Shell正就美國否決延長北極鑽油牌照搞緊司法覆核，認為Shell冇打算放棄鑽油計劃危害北極生態。國際特赦組織香港分會就提醒Shell，尼日利亞曾經發生漏油事故，影響當地人生計，反問「你真的想多謝這家跨國企業嗎？」
唔少網民覺得「一樣還一樣」，唔應該將支持本地創意行為同環保混為一談，留言批評今次亂搶道德高地同抽錯水，仲話「唔搵Shell下年搵你哋做Sponsor囉」。