農曆新年留港度歲，單身男女不妨到九龍灣MegaBox行吓桃花運。商場總監文靜芝話，農曆主題佈置叫「桃花運轉賀新禧」，全港首設高22呎金光閃閃轉運桃花樹裝置，每15分自轉一次。你轉時桃花又轉，轉到頭暈暈，一定會撞到個意中人。
講起桃花，商場搵咗專為Chanel、Saint Laurent等品牌創作花藝嘅花藝師Becky，打造咗一個保鮮花藝展覽館。佢話保鮮花源於法國，喺日本發揚光大，最近紅到香港。
所謂保鮮花，係用有機保存液保留花朵開得最燦爛嘅一刻，唔使打理淋水，保留3至5年，「今次特別用咗中國特色花卉例如蕙蘭、玉簪花等，做咗8盆展覽」。