上星期日，本來約了大記者、大編輯飲茶，但兩人話要去中環參加遊行，唔得閒，星期日往往有各種形式遊行，大記者佢哋呢次參加嘅係「尋人」、「反被失蹤」遊行，即係表達香港民主派人士對「李波無出境返內地」事件嘅反應。大記者來短訊話有6000人遊行，又幾多喎，不過警方就話只有3500人啫。
示威之前，已有報導引述李波妻子收到李波親筆信及視頻，講及：「這次返內地完全是我個人行為，是為了解一些個人事情，與他人無關，我不知道為甚麼有些人為了這件事大造文章。不管你們出於甚麼目的，要想從中取得甚麼利益，你們的行為已經嚴重干擾了我和我家人的日常生活，使我們遭遇到很大壓力，心力交瘁，這樣的氛圍下，我怎麼回香港。」
呢封信不知是否真偽，假如是假的，李波貌似俾ISIS綁架了嘅人質，被迫簽署聲明；假如是真的，就令人感到佢係自作自受，精神受損與人無尤。
乜唔係吖，一個男人有乜嘢個人行為會緊要到瞞騙老婆，自行潛行出境入大陸，搞到老婆不知所措，並向警方報警作「失蹤」案處理呀？從好嗰方面設想，係有公務、私人財務要處理，唔想老婆知道後，操心擔心（例如欠債或生意失敗）；從壞方面想，會係偷會情人，嫖妓之類，現在李波自述係「了解一些個人事情」，「個人事情」重要到連老婆都要瞞在鼓裏，實在十分可疑。
李波事件，勿論真相如何，已在國際間影響香港一國兩制形象，美國表示不安，歐盟關切，英國、瑞典查詢，相信北京亦意料所不及。上星期五，左丁山收到遠在三藩市嘅投資L來電話查詢此事，問吳亮星之言是否可信，左丁山問：「乜你咁鬼八卦，呢啲嘢都要問我！」投資L答：「非也，與八卦無關，三藩市灣區有不少投資基金經理知我係香港嘅老移民，逢係有關香港事情，凡係會影響投資決定嘅，都打電話問我，我咪問吓你攞料先囉。佢哋班基金佬幾擔心中國公安越境拉人，驚住香港呢個國際金融中心會加強管制，由中方背後操控呀！」梗係由中方背後操控嘅啦，不過此等事寧俾人知，莫俾人見，有邊個中方強力部門做此等事，都係不顧大局嘅鹵莽行為，實令習大大不悅！香港有隻新馬竟然名叫「宅大大」，英文名字係Simply Invincible，睇吓英文名嘅意思，嗰三位馬主張寶倫、朱永強、連德輝實在非常幽默。